Saturday, August 26, 2006

أيها المدونون .. ساعدوني لإنصاف هذا الرجل

أرجوكم أنصفوا هذا الرجل فهو رمز للرجال المحترمين في هذا الزمن.

أ د / أحمد حسين هو أستاذ ميكانيكا السيارات بكلية الهندسة جامعة عين شمس ، هو صاحب تصميم القاطرة التي حملت تمثال الملك رمسيس الثاني لمكانه الجديد وهو رجل يشيد كل من يعرفه بحسن خلقه وعلمه وتفانيه في عمله إلى أقصى الدرجات.
كان لي الشرف أن أتعلم منه طيلة أربع سنوات أثناء دراستي الجامعية ، كما أشرف
أثناء العام النهائي على مشروع تخرجي فتعلمت منه ما لم أتعلمه طيلة حياتي من تواضع و تصميم و مثابرة و جدية وغيرها من الخصال الكريمة

تابعت كما تابعتم جميعاً عملية نقل التمثال إلى موقعه الجديد وقد كنت مهتماً جداً بتصميم القاطرة والنظام الهيدرولكي الذي سمح للتمثال بالبقاء في وضع رأسي أثناء صعوده أو نزوله كبري المنيب

الرجل هو صاحب فكرة نقل التمثال في الوضع الرأسي بالرغم من زعم جميع الجهات وجوب نقله ممدداً أو مقسماً إلى أجزاء، حمل الفكرة على عاتقه و قام بتنفيذها على أكمل وجه ولا يخفى على أي منكم أنه كان سيُحمّل المسئولية كاملة في حالة حدوث مكروه للتمثال

وحده نجح وفشل الباقون ، كلكم شاهدتم فشل التليفزيون في البث و فشل الأمن في حفظ النظام و فشل وزارتي الإعلام و السياحة في الترويج للحدث

يقول الله الكريم "وهل جزاء الإحسان إلا الإحسان " نعم في مصر جزاء الإحسان هو الضرب بالجزمة القديمة فقد
إتصلت بي أمي وفوجئت بها تقول أن المذيعة منى الشاذلي تتحدث معه تليفونياً وأنه يشتكي من أنهم مزقوا اليافطة التي تحمل إسمه من على القاطرة !!!!

السوءال هو لماذا ؟
لماذا قام التليفزيون بإجراء حوار مع سائق القاطرة وأهمل المصمم؟
لماذا نزعوا إسمه من فوق تصميمه؟
لماذا طيلة البث لم يتم شكره؟
لماذا طلبوا منه تحمل المسئولية التامة ورغم ذلك لم يعطوه حقه بعد نجاح التصميم؟
لماذا يتم سرقة مجهود وإبداع المصريين؟
لماذا يجبرونا على كره حياتنا؟
لماذا كل هذا الظلم و الفساد؟
ألف و ألف لماذا
فلا المواطن البسيط الذي ضرب على قفاه في قسم الشرطة ولا أستاذ الجامعة الذي سُرق مجهوده سيجدوا من ينصفهم.
لقد شعرت بمرارة الظلم الإسبوع الماضي وأنا أشاهد كلب من كلاب الداخلية يضرب مواطن غلبان على وجهه أكثر من خمسون قلم -الأسد الهصور يدوب ملازم أول وبيعمل كدة في الناس أمال لما يبقى لواء – كأننا نشاهد أبو جهل يعذب المسلمين الأوائل في فجر الإسلام ،ولا عزاء للبسطاء.
وشعرت بقمة المرارة اليوم بعدما عرفت ما حث للأستاذ أحمد حسين ، ولا عزاء للعلم وأهله.
أرجوكم ساعدوني لإنصاف الرجل فلعل مجتمع المدونون يكون له صوت مسموع اليوم أو غداً، لعلنا نستطيع أن نعيد حقه هو أو مواطن القسم البسيط أو أي مواطن بيظلم بشكل أو آخر.
طبعاً أنا كنت أتمنى عمل المزيد له لولا ظروف بعدي عن مصر ... وأخيراً أقول حسبي الله ونعم الوكيل


شكراً

Wednesday, August 23, 2006

أبو سنجة طويلة

سرحت لما شفت في التلفزيون عبد المنعم مدبولي وهدى سلطان بيغنوا تووت...تووت.
الأغنية دي لما كانت بتيجي زمان كان كل الاطفال يرددوها بالذات الحتة بتاعة "ابو سنجة طويلة ...عامل هليلة... توت توت توت"
دلوقتي العيال كله قاعد قدام سبيس توون ومركز قوي مع سابق ولاحق وعاملين زي العجول من كتر اكل الحلويات
وولما جت بنتي اللي عندها سنة ومسكت في بنطلوني بقى كل اللي في بالي - أمال البنت بنتي دي هاتتفرج على ايه ان شاء الله؟ ,ده انا حتى أظن ان توم وجيري اتصالحوا وبيخمسوا في طقم سنان واحد دلوقتي...أي كارتون حاليأ عبارة عن صراعات يا إما على كرة أو بوكيمون ..

أنا شخصيأ بتبسط جدأ لما أشوف اي برنامج من برامج طفولتي المفضلة ولا أشعر بأي حرج في متابعتهم .... وياسلام بقى لو ربنا رزق بحلقة من كارتون السنافر, مراتي تعلن حالة الطوارئ لمتابعتها ... ولا كوكي كاك يا سلاااااام دي تبقى ليلة :_)
المهم إن ربنا يستر على العيال الغيرة من التخلف العقلي اللي بيشوفوه برة وجوة التليفزيون.

Thursday, August 17, 2006

نــتـــف الحاجب بخمس درجات

للأسف أختي المراهقة تعيش بصحبة أهلي بالسعودية , أثناء حوار لى معها عن الفكر السلفي الوهابي وخطورته على المنطقة ككل فوجئت بها بتقوللي ان في مدرستها بالسعودية يتم خصم خمس درجات من كل طالبة تهذب حواجبها !!!!!

طبعأ انا إتكهربت وعيني إحمرت وقلتلها يا صلاة النبي أحسسسنننن , خشي عليا بقى بكل الحكايات

المهم إكتشفت المصايب السودة من عينة أنهم يحضروا كفن ويلفوا فيه بنت من البنات ويشيلوها في جنازة تخيلية (جاتهم نيلة) , أو يكون موضوع الإذاعة المدرسية هو الثعبان الأقرع وإلى أخره من مواضيع شيوخ الأحاديث المفبركة.

أما اللي فقع مرارة أمي إنهم كمان بيدعوا لأولاد الحج عبد العزيز بالإجبار ومقتنعين إنه بيصرف على الحرمين من جيبه !! بس صحيح هي العيال الصغيرة هاتعرف منين كم المليارات اللي بتخش للحرم سنويا.

و أخيرا انا بست إيدي وش و ضهر إن عمر ما حد كشف على شعر العانة مثلا عشان يدولي درجات النشاطات

Wednesday, August 02, 2006

ونبايع حيوانات الريس المنوية كمان !!

الحكاية وما فيها إن أنا من ساعت حرب إسرائيل و لبنان وأنا باتخانق مع مراتي كل يوم أثناء متابعة قناة الجزيرة (الله ينكد عليهم ) لأن أنا لي رأي مختلف في موضوع لبنان وهو :
أنا شايف إن حالتنا كعرب بقت كرب جدآ ،يعني على سبيل المثل.
- مصر/ الحكومة مش بتفكر غير في إزاي يركبوا جيمي مكان أبوه بينما الشعب جبلة ومش همة غير رنات الموبيلات،ولو إتناقشت مع حد يقولك " أصل الناس مش لاقية تاكل !!!!"
- السعودية / من يوم ما البلد دي إشتراها الحاج عبد العزيز وورثها من بعده الولاد .... والولاد والشعب والمفتيين بتوعهم ما وراهمش حاجة غير تثبيت الأسرة فوق نفس البلد وده طبعأ بعد بل ريقهم بتخفيض سعر البنزين رغم إرتفاع سعره عالميأ !!!!!
- سوريا / الراجل بيقول سوف تدخل سوريا الحرب إذا إعتدت إسرائيل على أراضيه.....أمال الجولان دي إيه؟!!!!

- اليمن / بيجهزوا دلوقتي لمظاهرات صاخبة لتأييد الحيوانات المنوية للزعيم الملهم ... أنا بأقترح عليهم يجربوا الإستنساخ !!!!!
- الكويت / مشغولين في فرح مشاركة المرأة - اللي ما كسبتش ولا صوت - بالإنتخابات .... على كدة ممكن ده يكون نواة لحصولها على كرسي كمان32241846 سنة ولا أنا كدة متفائل زيادة

- دول المغرب العربي / مين دول؟؟؟!!!!!
- باقي دول الخليج / دول ناس طيبين وزي مالكل هايعمل هما كمان هايعملوا
- ليبيا / الأخ العقيد لم يقوم بتسديد الإشتراك لذا قامت السعودية - بصفتها التخينة فيهم - بسحب أبونيه العروبة منهم !!!!

يعني إحنا أصلأ لازم نتعالج الأول وبعدين نفكر إزاي نخلص من جار السو ده .... ولا إيه؟