CLS 500 الشيخ مرسيدس
يوم الجمعة الماضية جذب إنتباهي منظر إستفزني جداً .
فقد دخل إلى صلاة الجمعة بأحد مساجد كاليفورنيا (التي تنتهي زيارتي لها قريباً للأسف) أحد الشيوخ ليلقي خطبة الجمعة.
الشيخ الجميل ترجل من سيارة مرسيدس أخر موديل يعتبرها الأمريكيين نفسهم دلالة رفاهية عالية.
إنطلق لا فض فوه في خطبة ضعيفة عبارة عن خليط من إنجليزية ركيكة و عربية طغا عليها الزمن, إنطلق في خطبة عن الإمتثال بسيدنا محمد (ص) كمثل أعلى في جميع أعمالنا ما ظهر منها و ما بطن.
لقد فكرت في لحظة أن أقف و أسب له هو و كل أمثاله من شيوخ الموبايلات , كان نفسي فعلاً أفش غلي فيه كنموذج حي أمامي عن جميع شيوخ اليومين دول.
كل واحد فيهم يركب سيارة ثمنها ملايين و يحاضرنا عن السنة و مطلق لحيته لأن دي السنة .... يا سلااااااام.
النبي الكريم كان يربط الحجر على بطنه من الجوع لأنه يتصدق بقوت يومه و مات راهناً درعه عند جاره اليهودي و لم يترك درهماً إشمعنا دي مش سنة لكن الذقن و الشكليات سنن!!!!
نفسي حد من الذين يعملوا في القنوات الفضائية يقرا البوست ده و يرد علي السؤال ده .... الإخوة مشايخ الفضائيات يتقاضوا كم في الحلقة الواحدة ؟
أنا أتوقع مبلغ كبيرمثلاً لكل حلقة علشان يرددوا على أسماعنا كلام محفوظ من كتب قديمة بدون أي تقديم لحلول أو أفكار تدفع بعجلة الحياة للأمام
أخيراً إللي عايز يسمع الوعظ ده هو حر أما أنا فلن أسمع لأحد حتى يثبت لي أنه يتكلم أولاً عن علم و ثانياً لوجه الله.
ملحوظة أنا سكت و قلت بلاش فضايح و مشاكل و روحت علشان أقرا الأخبار ألاقي بيل جيتس متبرع بمبلغ و قدره لمؤسسة خيرية للمرة الخامسة على التوالي في الست شهور الأخيرة .... بعد إذنكم علشان ضغط دمي إرتفع تاني.
posted by Ahmoss at 9:26 PM
11 Comments:
التدوينة فيها ثغرات كبيرة. ليس مطلوبا أن نجوع مثل الرسول. وعموما لو جاع هذا الخطاب فلن يستطيع أن يلقي خطبة أو يعطي عظة ولربما سقط مغشيا عليه. ربما لا يستطيع أن يصوم التطوع أصلا.
ولماذا تفترض أنه لم يتبرع بأموال كثيرة لمجرد أنه يركب مرسيدس؟ يمكن يكون تبرع في السر ويمكن المرسيدس ليست ملكه أصلا.
طالما أن تطبيق السنة النبوية أو عدم تطبيقها لن يضر أحدا فلا داعي لانتقاد الرجل. يعني مثلا هو ملتحي وغني بشكل فاحش وهنقول كمان أنه مبذر علي نفسه.. طيب ما الضرر الذي وصل اليك هنا؟ ده بافتراض أصلا انك تعرف تفاصيل حياته.
مشايخ الفضائيات منهم من يأخذ مقابل مادي ومنهم من لا يفعل. في كل الأحوال هو لا يأخذ نقودا من دم الشعب حتي لو كان كلامه مايساويش بصلة ففي النهاية اللي بيدفعله الفلوس هو صاحب القناة واللي عارف انه هيربح من ورا كلام الشيخ أيا كان مستواه.
بالنسبة للمقارنة مين دفع كام ومين دفع أكتر منه ،أعتقد أنها مقارنة ينقصها الدقة لأن بيل جيتس لو اتبرع بخمسة وأربعين مليون دولار في السنة هيبقي يدوب اتبرع بمكسب يوم واحد من أرباحه أما بقي لو مدرس مصري اتبرع بخمسين جنيه مصري يبقي اتبرع بثلث مرتبه الشهري. المسألة هنا نسبية تماما.
كنت أتمني أن أسمع محتوي وتحليل خطبة الجمعة منك لأنني مهتم بهذا المجال.
شكرا
أنا يا سيدي القاضل لم أجزم بأن الراجل لا يتصدق أو غيره لكن ألا توافقني أن من الغريب أن يركبوا جميعاً سيارات فارهة رغم كون مهنتهم ليس من أهدافها الرئيسية الربح و لكن يأتي الربح على هامش منها!!!
أما بخصوص الخطبة التي ألقاها فأنا مش عارف أقول إيه لقد كان يا سيدي الفاضل يحث الأباء على إدخال أبنائهم المدارس الإسلامية الغير مختلطة و التي لا يعم فيها الفساد كسائر المدارس الأمريكية
أنا أعتقد إن ده يبرز علامة إستفهام كبيرة وهي إذا كنت يا مولانا شايف إن المجتمع الأمريكي فاسد فلماذا هاجرت إليه؟
بالإضافة إلى أن المسلم يجب أن يخالط الناس ليروا حسن خلقه و لا ينعزل عنهم.
عموما أنا كتبت إللي كان في بالي لما شفته و إللي كنت أتمنى إن شيوخنا يكونوا عليه من سلوك و مظهر
تحياتي
انا اوافق علي كلام احمس لان اوضاعنا فعلا اصبحت في الحضيض
بلادنا اجهل بلاد الارض و افقرها و اقلها انتاجا ووووووووو
الكثير من البؤس الذي تثيرنا به الاحصاءات الرسميه للمنظمات الدوليه
هل يعقل مثلا ان يكون الانتاج الاسرائيلي وحده عشر اضعاف الانتاج العربي كله!!!!!!؟
شيء مؤسف
السنه تدعونا الي ان نكون سادة الارض فاذا وجدنا امتنا في الحضيض فالاولي ان تكون جهودنا منصبه علي اعادة الامه الي مكانها لا الي اعادة النقاب و اللحيه و الجلباب القصير و باقي الشكليات
اما عن اجور شيوخ الفضائيات الله اعلم بها لكنها حسب ظني كبيره كبييييييييييره
طيب لما هو كدة؟؟
مش يخاطب الناس فى حاجة مفيدة احسن؟
من امتا كان الاختلاط غلط؟؟
دى حجة ابتدعناهاا لالهاء الناس فيها
مااتكلمش لية على حسن معاملة الجوار؟
ماتكلمش لية على حق اليتيم؟
مااتكلمش لية على علاقة الحاكم بالمحكوم؟
مااتكلمش لية على سلوكيات المسلم نحو اخيه المسلم؟
مااتكلمش لية عن الربا؟
مااتكلمش لية عن الزنا؟
مااتكلمش لية عن اسلام العقول والقلوب؟
مااتكلمش لية عن دفع الاسلام للمسلمين للبحث عن العلم ولو فى الصين؟؟
ولا العلم بس جعلوه فى الاسلام قاصر على العمة والجبة والقفطان؟
متكلمش لية عن التكافل الاحتماعى فى الاسلام والمجتمع اكيد حوله مليان مسلمين تحت الصفر؟؟
متكلمش لية عن مكانة المرأة فى الاسلام؟
متكلمش لية عن مدى احترام الاسم للأديان الأخرى واحترامه لحرية العقيدة؟؟
محاولش ليهيغير النظرة القبيحة للغرب عننا؟؟
فالح بس يتكلم عن منع الاختلاط فى المدارس؟؟
يخى جاته نيله
المحاضرة الجاية حيتكلم عن مدى شرعية قضاء الرجل حاجته أما سحلية عمشة حتى لا تظهر عورته أما السحلية
جاتهم القرف
هم اللى جابونا ورا
ايه يااحمس غيبتك طولت قوي ..انت فين يا عم؟
سبحان الله
أنا مش فاهم يعني أنا لو حلقت دقني ولبست البدلة والكرافتة والمرأة المنتقبة خلعت نقابها وعرت جسمها المسلمون هيتقدموا
أين عقولكم لست أدري
هل التقدم إننا نعرض عن أوامر النبي التي أجمع عليها العلماء
بدل ما انتم عمالين تنقضوا بجهل وبدون علم شوفوا الأول الأئمة الأربعة (إا كنتم بتعترفم بهم أصلا) قالوا إيه في إثم حالق اللحية وتفسيقه وعدم قبول شهادته وغتباره ملعون لأنه متشبه بالنساء (شوفوا الأئمة الأربعة قالوا الكلام ده ولا أنا بادعي وبعدين ابقوا انقضوا)
وبعدين الرسول لما قال علموا أبنائكم الصلاة وهم أبناء سبع واضربوهم عليها وهم أبناء عشر ألا يدل ذلك على حرمة الاختلاط يعني نفرق بين الأخ وأخته وما نفرقش بين الرجل والمرأة من غير المحارم؟!!!!!!!!!
وبعدين المشايخ بياخدوا أجور كبيرة ولا صغيرة هو ده يعني مال حرام ولا حلال هو ده الفيصل مش الفيصل أنه كثير ولا قليل
وبعدين هو كون النبي كان فقيرا يعني الغنى حرام
طيب هو فيه أتقى وأورع وأخشى من الصحابة
فما بالك إن واحد من العشرة المبشرين بالجنة وهو عبد الرحمن بن عوف كان غنيا بل مات وثروته 8 ألف ألف (يعني 8 مليون) درهم فهل منعه هذا من التقى والعفاف أو منعه من أن يكون من المبشرين بالجنة؟!!!!!!!!!!!!!!!!!!!!!
وعثمان بن عفان كان غنيا جدا حتى أنه أنفق على ثلث جيش العسرة (تخيل ثلث جيش عددهم وعدادهم وتموينهم ) من ماله الخاص
فما سمعنا يوما أحد يطعن في عثمان لآنه كان غني؟!!!!!!!!!!!!!
أنا والله باستغرب لو كان اللي بيتكلم طبيب ولا مهندس ولا في أي تخصص يتكلم في تخصصه ما كان أحد أخذ عليه كل هذا الأخذ
إشمعنى الدين اللي بتدوروا على أي قطط فاطسة عشان تطلعوها
مش عجبك الخطبة مش عاجبك الخطيب مش عجبك دين ربنا كله . . . أنت حر ما على الرسول إلا البلاغ
وانت وغير لآ هتزودا الإسلام ولا هتنقصوه
وياريت اللي بيته من زجاج ما يحفش الناس بالطوب
بص لنفسك أنت الأول . . قدمت إيه للإسلام وللمسلمين يا عم الحليق اللي بتلبس على كيفك وبتلبس مراطمك وبناتك وعيالك على كيفهم وعايش حياة الاختلاط
ها قدمتلنا إيه يا سيدي؟؟؟؟؟
رحم الله من قال:
المرء إن كان مؤمنا ورعا
أشغله عن عيوب الورى ورعه
كا السقيم العليل أشغله
عن وجع الناس كلهم وجعه
ربنا يهدينا ويهديييييييييييييك
السلام عليكم .. أحمس .. أنا اعتبرني أخوك الصغير محمود .. في كلية طب أرجو إني أتنا قش معاك في الموضوع ده لو تحب عالايميل dr.ma7moud@windowslive.com
انا معاك بالفعل انا ضيعه وتعبت فعلا من كتر الكلام ده لدرجه ان انا كدت اصيب بالجنون انا لو عايزه اكتب كتاب عن الموضوع ده على النت اعمل ايه
شكرا علي الموضوع
اسلوبك جااااامد جداً فى الكتابة .
وفعلاً الواحد بيشوف من الشيوخ دول كتييييير .
nice blog
Post a Comment
<< Home